საქართველოს განათლების, მეცნიერებისა და ახალგაზრდობის მინისტრი, გივი მიქანაძე; პროფესიული განათლების დეპარტამენტის უფროსი, თამარ კვინიკაძე; პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე, მარიამ ლაშხი; ასევე, ადგილობრივი ხელისუფლების წარმომადგენლები, სტუმრად კაჭრეთში, კოლეჯში „აისი“ იმყოფებოდნენ.

კოლეჯის „აისი“ ხელმძღვანელმა, მალხაზ ასლამაზაშვილმა, თავდაპირველად სტუმრებს კოლეჯის პროფესიული სტუდენტების მიერ წარმოდგენილი საგამოფენო სივრცეები დაათვალიერებინა და ის პროფესიული საგანმანათლებლო პროგრამები გააცნო, რომელიც კოლეჯში ისწავლება.

შემდეგ, მინისტრმა და კომიტეტის თავმჯდომარემ პროფესიული სასწავლებლების ხელმძღვანელებთან სამუშაო შეხვედრა გამართეს.

ღონისძიების ფარგლებში, გივი მიქანაძემ და მარიამ ლაშხმა, კოლეჯების „აისისა“ და „პრესტიჟის“ პროფესიული საგანმანათლებლო პროგრამა „კომპიუტერული ქსელი და სისტემების“ ინტეგრირებული ჯგუფების კურსდამთავრებულებს სერტიფიკატები და სამახსოვრო საჩუქრები გადასცეს.

დასასრულს, კოლეჯის ღვინის სახლში მინისტრმა და კომიტეტის თავმჯდომარემ საკუთარი ხელით ჩამოასხეს ღვინო და სამახსოვრო ავტოგრაფები დატოვეს.